Ylfete Fanaj, me prejardhje nga Prizreni, është politikanja e parë me prejardhje shqiptare e zgjedhur në një asamble komunale dhe pastaj edhe në një parlament kantonal, në Zvicër.
Të martën e 23 qershorit ajo do të zgjidhet kryetare e Parlamentit të Kantonit të Luzernit, një vit pasi ajo ishte zgjedhur nënkryetare e këtij parlamenti.
Nga viti 2011, Fanaj është deputete në Parlamentin e Kantonit të Lucernit, ndërsa në vitin 2007 ishte zgjedhur për herë të parë këshilltare në Asamblenë e qytetit të Luzernit.
Prej disa vitesh ajo ka qenë edhe kryetare e Grupit Parlamentar të SP-së në parlamentin në fjalë.
Me këtë përvojë në politikë, Ylfete Fanaj është një emër me peshë në politikën e kantonit të saj e më gjerë.
Me zgjedhjen në postin e lartpërmendur, Ylfete Fanaj ka arritur më shumë se cilido politikan me rrënjë shqiptare në politikën zvicerane.
Gazeta Luzerner Zeitung i ka kushtuar asaj një portret të gjerë në numrin e sotëm.
Ndërsa vetë Fanaj në një postim në rrjetin social Facebook ka shkruar se është e nderuar me marrjen e këtij e detyrës së re.
“Është një nder për mua të marr përsipër këtë detyrë me përgjegjësi. Mezi pres të gjitha takimet këtë vit”, ka shkruar Fanaj.
